|
 «Երազիս մեջ այրում էիր
Նամակներս քեզ գրած,
Ա՜խ, նրանց մեջ թե բանայիր,
Իմ սիրտը կար, իմ սիրած»
Հովհաննես Շիրազի այս տողերը գարնանն առաջին անգամ հնչեցին Թուրքիայի տարբեր հեռուստաալիքների եթերում: Երգը կոչվում էր «Նամակ»: Կատարողը ստամբուլահայ երգչուհի Սիբիլ Փեքթորոսօղլուն էր: Երգչուհին այս տեսահոլովակից հետո հայտնի դարձավ ոչ միայն ստամբուլահայերի շրջանում, այլ ամբողջ Թուրքիայում և Հայաստանում:
«Երբ տեսահալովակս հեռուստաեթերով ցույց տվեցին շատ երջանկացա: Աշխարհի զգացմուներն ունեցա: Ես չեմ վախնար հայերեն երգելուց, որովհետև երաժտությունը համազգային է»,- «Մեդիալաբին» ասում է Սիբիլ Փեքթորոսօղլուն:
Երգչուհին ծնվել է Պոլսում: Ավարտել է Մխիթարյան վարժարանի նախակրթարանը: Նրա պատմելով ընտանիքի անդամները տանը միայն հայերեն էին խոսում: Հայրը շատ խիստ էր, ասում էր`««Այս տունի մեջ միայն հայերեն պիտի խոսվի»:
Սիբիլը սկսել է երգել 1991 թվականից ` Պոլսո «Սուրբ Վարդանանց» երգչախմբում: Երաժշտական որևէ կրթություն չունի, մասնագիտությամբ տնտեսագետ է, աշխատում է բանկում: Սակայն ասում է, որ միշտ երգել է և առանց երգի իրեն չի պատկերացնում:
Սիբիլի «Նամակ» երգի տեսահոլովակն առաջինը ոգևորել է ստամբուլահայ համայնքին: Ազգությամբ հայ Թուրքիայի քաղաքացի Մելիսա Պոզը պատմում է, որ երբ առաջին անգամ լսել էր հայերեն երգը հուզմունքից չգիտեր` ինչ աներ:
«Ես առաջին անգամ, որ լսեցի, գժվեցի: Մտա ինտերնետ ու նրա անունը գրեցի: Ֆեյսբուքով նրան գտա, խոսեցի հետը: Մենք Սիբիլի մասին անգամ հաղորդում ենք պատրաստել: Մի խոսքով, բոլորս ուրախությունից խենթանում էինք»,-«Մեդիալաբին» պատմում է Մելիսան:
Նրա խոսքերով, չնայած ստամբուլահայ համայնքում շատերը Սիբիլին վաղուց էին ճանաչում, այնուամենայնիվ ոմանք սկզբից չհասկացան, թե ով է նա:
«Նախ շատերը չհավատացին, որ նա Թուրքիայի հայ է: Ասացին`Հայաստանից է: Բայց հետո տեսան, որ սոցիալական ցանցում իր էջն արևմտահայրեն է, ուրեմն` սիրիահայ, կամ լիբանանահայ է: Բայց վերջում համացանցի միջոցով բոլորը հասկացան, որ նա եկեղեցու երգչախմբում երգող մեր քույրիկն է»,-ոգևորված պատմում է Մելիսան:
Երգչուհի Սիբիլ Փեքթորոսօղլույի խոսքերով չնայած հայերեն տեսահոլովակի նկարահանումից հետո շատերը նրան ճանաչեցին, այդուհանդերձ նրա կյանքը իրականում փոխվեց 2010 թվականի նոյմեբերի 10-ին, երբ թողարկվեց առաջին սկավառակը: Հենց այս սկավառակը աշխարհին ներկայացնելու համար էլ ընտրվեց հայերեն «Նամակ» երգը:
Երգչուհու խոսքերով` հայերեն երգելը Ստամբուլում ոչ մի դժվարության չի հանդիպում: Ավելին, ասում է, որ շատ թուրք երաժիշտներ սատարել և օգնել են նրան: Սիբիլը պատմում է, որ նույնիսկ իր տեսահոլովակի նկարահանման ընթացքում ողջ նկարահանող խումբը քթի տակ «Նամակն» էր մրմնջում: Շատերը երգի բառերի լատինատառ տարբերակն էին խնդրում, որպեսզի կարողանային ձայնակցել երգչուհուն:
«Երաժշտական որևէ ուսում չեմ ստացել, բայց և այնպես ինքս իմ վրա աշխատելով, զարգացրել եմ երաժշտական ճաշակս: Երգչախմբից բացի շատ սիրում էի էստրադային երգերը, հատկապես հայ երգը»,-ասում է Սիբիլը:
Սիբիլը հավատում է, որ երաժշտությունը վերազգային արժեք է, իսկ ինքը իր երգերով մարդկանց փորձում է տալ «Մարդասիրություն, հայրենասիրություն և իհարկե Աստվածասիրություն»:
Ի դեպ հայրենասիրության մասին: Սիբիլ Փեքթորոսօղլուն շատ լավ է ճանաչում Հայաստանի գրեթե բոլոր երգիչ երգչուհիների կտարումները:
Հայաստանը ընդհանրապես երգչուհու կյանքում կարևոր տեղ է գրավում: Նա պատմում է, որ երբ Համահայկական խաղերի բացմանը մասնակցելու առաջարկ էր ստացել, շատ էր ոգևորվել: Դա իր համար մեծ պատիվ էր:
«Կարող եմ ասել, որ դրանք իմ կյանքի ամենալավ օրերն էին: Շատ կարևոր ու արժեքավոր անձերու հետ ծանոթացա: Բոլորն էլ ասում էին` «Սիբիլ քեզ ինչպես կարող ենք օգտակար լինել»»,-պատմում է «Մեդիալաբին» Սիբիլ Փեքթորոսօղլուն:
Երգչուհու համար այս ամենը միայն սկիզբն է: Նա համագործակցության շատ առաջարկներ է ստացել և պատրաստավում է շարունակել իր գործը:
«Ստացած բոլոր առաջարկները պետք է նկատի առնեմ: Նաև պետք է աշխատեմ երկրորդ սկավառակի վրա: Այս մեկ դարձյալ հայերեն երգեր պիտի պարունակի: Ամենամեծ փափագներիցս մեկն էլ հայկական երաժշտությանը նոր երգեր նվիրելն է: Հներն արդեն մերն են, ինչու իմ երգերս էլ անմահ երգերի մեջ չանցնեն»,- երազում է պոլսահայ երգչուհի Սիբիլ Փեքթորոսօղլուն:
Լիաննա Խաչատրյան
© Medialab.am
Սիբիլի «Նամակ» երգը լսելու համար սեղմեք այստեղ
|
